विराटनगर।विराटनगर महानगरपालिका–१५ का रोशन साहले आफ्नी ३२ वर्षीया श्रीमती कोमल कुमारी साहको हत्या गरेको सनसनीपूर्ण तथ्य खुलेको छ। मोरङ प्रहरीको प्रारम्भिक अनुसन्धान अनुसार रोशनले श्रीमतीको घाँटी थिची हत्या गरेपछि हात-खुट्टा बाँधेर वडा नं. १७ स्थित छला फ्याक्ट्री नजिकैको कल्भर्टमुनि फालेका थिए।शव फेला परेको ६ दिनअघि नै रोशनले श्रीमती हराएको सूचना प्रहरीलाई दिएर अनुसन्धान भड्काउने प्रयास गरेका थिए। तर, शवबाट दुर्गन्ध आउन थालेपछि स्थानीय र वडा अध्यक्षको सूचनाका आधारमा प्रहरीले कल्भर्टमुनिबाट शव बरामद गरेको हो।प्रहरीका अनुसार दाम्पत्य कलह र परपुरुषसँगको सम्बन्धको आशंकामा रोशनले श्रीमतीको हत्या गरेको प्रारम्भिक अनुसन्धानबाट खुलेको छ।हाल आरोपी रोशन साह प्रहरी नियन्त्रणमा छन्। शवको पोस्टमार्टम रिपोर्ट आउन बाँकी रहेको र घटनाबारे थप अनुसन्धान भइरहेको मोरङ प्रहरीले जनाएको छ।
