युवराज शाह taraitimes,विराटनगर। माध्यमिक शिक्षा परीक्षा (SEE) २०८१/८२ भोलि चैत १९ गते बिहीबारदेखि देशभर एकैसाथ सुरु हुँदैछ। राष्ट्रिय परीक्षा बोर्डले परीक्षाको सम्पूर्ण तयारी पूरा भएको जानकारी दिएको छ।परीक्षा नियन्त्रण कार्यालय (कक्षा १०) का उप-नियन्त्रक विष्णुप्रसाद ज्ञवालीका अनुसार यस वर्षको परीक्षामा देशभरका कुल ११ हजार ३ सय ७९ विद्यालयका ५ लाख ४ हजार ७१ जना परीक्षार्थीहरू सहभागी हुँदैछन्। यस वर्ष छात्रभन्दा छात्राको संख्या बढी देखिएको छ, जसमा २ लाख ५३ हजार २ सय ९९ छात्रा र २ लाख ५० हजार ७ सय ७२ छात्र रहेका छन्।कुल परीक्षार्थी: ५ लाख ४ हजार ७१ (नियमित ४,३८,१७६ र ग्रेड वृद्धि ६५,८९५)।परीक्षा केन्द्र: देशभर कुल १ हजार ९ सय ६६ परीक्षा केन्द्रहरू तोकिएका छन्।प्राविधिक धार: ५ सय ५ विद्यालयका १५ हजार ७ सय ४९ परीक्षार्थीहरू प्राविधिक विषयतर्फ सहभागी छन्।जापानमा केन्द्र: जापानमा रहेको १ केन्द्रबाट २३ जना नेपाली विद्यार्थीले परीक्षा दिनेछन्।जनशक्ति: परीक्षालाई मर्यादित र सुरक्षित बनाउन करिब ७५ हजार सुरक्षाकर्मी र कर्मचारीहरू खटाइएको छ।१.महिनाभित्रै नतिजा सार्वजनिक गर्ने लक्ष्य: यस पटकको SEE को सबैभन्दा ठूलो समाचार भनेको नतिजा प्रकाशनको समय हो। उप-नियन्त्रक ज्ञवालीका अनुसार, यस वर्ष परीक्षा सकिएको एक महिनाभित्रै (बैशाख मसान्तसम्म) नतिजा सार्वजनिक गर्ने लक्ष्य राखिएको छ। नतिजा छिटो निकाल्नका लागि पहिलो पटक परीक्षा केन्द्र वा नजिकैको समन्वय केन्द्रमै उत्तरपुस्तिका परीक्षण गर्ने र डिजिटल माध्यमबाट अंक प्रविष्ट गर्ने नयाँ व्यवस्था मिलाइएको छ।
नयाँ ग्रेडिङ प्रणाली (NG System):: यस वर्षदेखि 'लेटर ग्रेडिङ निर्देशिका २०७८' पूर्ण रूपमा लागू गरिएको छ। जसअनुसार परीक्षार्थीले सैद्धान्तिक (Theory) तर्फ प्रत्येक विषयमा कम्तीमा ३५ प्रतिशत (१०० मा ३५ अंक) ल्याउनै पर्नेछ। ३५ अंकभन्दा कम ल्याउने विद्यार्थीको ग्रेडसिटमा 'NG' (Non-Graded) उल्लेख हुनेछ र उनीहरूले कक्षा ११ मा भर्ना हुन पाउने छैनन्।
परीक्षार्थीलाई विशेष निर्देशन: भोलि बिहान ८:०० बजेदेखि ११:०० बजेसम्म पहिलो दिन अनिवार्य अंग्रेजी विषयको परीक्षा सञ्चालन हुनेछ। बोर्डले परीक्षार्थीहरूलाई आधा घण्टा अगावै प्रवेशपत्रसहित केन्द्रमा पुग्न आग्रह गरेको छ। परीक्षा हलभित्र मोबाइल फोन, स्मार्ट घडी वा कुनै पनि विद्युतीय उपकरण लैजान पूर्ण रूपमा निषेध गरिएको उप-नियन्त्रक ज्ञवालीले जानकारी दिनुभएको छ।
तराई टाइम्स परिवार सम्पूर्ण परीक्षार्थी भाइबहिनीहरूलाई उत्कृष्ट परीक्षाको शुभकामना व्यक्त गर्दछ।
तराई टाइम्स डट कम (taraitimes.com)
ताजा समाचारको लागि हामीलाई फलो गर्दै गर्नुहोला।
