युवराज शाह ,विराटनगर फागुन २२।
२०८२ फागुन २१ को निर्वाचनबाट चुनिएका प्रतिनिधि सभाका नयाँ सांसदहरूले राज्यकोषबाट पाउने पारिश्रमिक र सेवा-सुविधाको विवरण सार्वजनिक भएको छ। विराटनगर लगायत तराई क्षेत्रबाट काठमाडौँ प्रतिनिधित्व गर्ने सांसदहरूले मासिक तलबका साथै बैठक र यात्राको दूरीका आधारमा आकर्षक भत्ता प्राप्त गर्नेछन्।
taraitimes.com ले संकलन गरेको विवरण अनुसार सुविधाहरू यस प्रकार छन्:
सांसदको मासिक पारिश्रमिक: प्रत्येक सांसदले मासिक ६६,०७० रुपैयाँ तलब पाउनेछन्। यसका साथै सञ्चार (३,०००), विशेष भत्ता (१,०००) र धारा-बिजुली (२,०००) गरी थप नियमित सुविधा दिइनेछ।
बैठक भत्ता र यातायात: संसद्को पूर्ण बैठक वा संसदीय समितिको बैठकमा सहभागी भएको दिन सांसदले १,००० रुपैयाँ बैठक भत्ता र थप १,००० रुपैयाँ यातायात खर्च गरी दैनिक २,००० रुपैयाँ अतिरिक्त बुझ्नेछन्।
यात्रा र दूरी भत्ता: आफ्नो निर्वाचन क्षेत्रबाट काठमाडौँ आउँदा-जाँदा वा भ्रमणमा रहँदा दैनिक २,५०० रुपैयाँ भत्ता र दूरीका आधारमा हवाई वा गाडीको टिकट खर्च उपलब्ध गराइन्छ। सांसदहरूको २० लाख रुपैयाँ बराबरको सामूहिक यात्रा बीमा समेत गरिएको हुन्छ।
आवास र सचिवालय: काठमाडौँमा घर नहुने सांसदलाई मासिक १८,००० रुपैयाँ आवास भत्ता र घर हुनेलाई ९,००० रुपैयाँ मर्मत खर्च दिइन्छ। साथै, प्रत्येक सांसदले नायब सुब्बा सरहको एक जना स्वकीय सचिव राख्न पाउनेछन्।
निर्वाचित जनप्रतिनिधिहरूले पाउने यी सुविधाहरूको बदलामा जनताले विकास र सुशासनको ठूलो अपेक्षा राखेका छन्।
12 March 2026
